जनकपुरधाम, मंसिर ५ । प्रदेश सरकारका नवनियुक्त दुई जना मन्त्रीहरुले आज पद तथा गोपनीयताको सपथ ग्रहण गर्नु भएको छ ।
प्रदेश प्रमुख हरिशंकर मिश्राले मुख्यमन्त्री लालबाबु राउतद्वारा नवनियुक्त उद्योग , पर्यटन तथा वन मन्त्री शत्रुधन महतो र कानून , न्याय तथा प्रदेशसभा मामिला मन्त्री प्रमोद कुमार यादवलाई पद तथा गोपनीयताको सपथ गराउनु भएको हो ।
प्रदेश २ सरकारमा माधव नेपाल नेतृत्वको नेकपा एस पनि सहभागी भएको छ । आज नेकपा एसका तर्फबाट संसदीय दलका नेता शत्रुधन महतो र साँसद प्रमोद यादव मन्त्रीको शपथ लिएका हुन् ।
नेकपा एमालेबाट विभाजन भएर बनेको नेकपा एसको प्रदेशसभामा १३ साँसद छन् । यसअघि नै नेकपा एसलाई सरकारमा ल्याउने प्रयास भएको थियो । तर मन्त्रालयको भागबण्डामा कुरा नमिल्दा नेकपा एस सरकारमा गएको थिएनन् । सहमती जुटाउन नेकपा एसका अध्यक्ष माधव नेपालसँग भेट्न मुख्यमन्त्री लालबाबु राउत काठमाडौं नै पुगेका थिए ।
काठमाडौंमा भएको सहमती अनुसार नेकपा एसलाई उद्योग, पर्यटन, तथा वन मन्त्रालय दिन मुख्यमन्त्री राउतले मन्त्री रामनरेश रायलाई पदबाट बर्खास्त गरेका छन् । तत्कालिन राजपाको कोटाबाट मन्त्री बनेका राय जसपा फुटेर लोसपा बनेपनि पद जोगाउनकै लागि उनी जसपामै बसेका थिए । तर अन्ततः उनले पद गुमाउनु परेको छ ।
जसपाले नेतृत्व गरेको प्रदेश सरकारमा यसअघि नै नेपाली काँग्रेस र नेकपा माओवादी केन्द्र सहभागी भइसकेको छ । जसपा विभाजन भएपछि तत्कालिन राजपाको तर्फबाट बनेका मन्त्री र राज्यमन्त्रीहरुलाई हटाएर काँग्रेस, माओवादी र नेकपा एसलाई सरकारमा सहभागी गराउनु भएका हुन् ।
