काठमाडौं । शनिबार बसेको जनता समाजवादी पार्टी (जसपा) को अध्यक्ष उपेन्द्र यादव समूहको संसदीय दलको बैठकमा देउवा सरकारमा सहभागी दलहरुबीच समान हैसियतामा मन्त्रालय बाँडफाँट हुनुपर्ने माग राखिएको छ ।
यादव समूहको बैठकमा नेताहरुले सरकारमा जति दल सहभागी भए पनि समान हैसियतमा मन्त्रालय बाँडफाँट हुनुपर्ने धारणा राखेका हुन् ।
देउवा सरकारमा हाल नेपाली कांग्रेसका दुई र नेकपा माओवादी केन्द्रका दुई जना मन्त्री बनेका छन् भने जसपाबाट मन्त्री बनेका छैनन् । राजमो पार्टी भने सरकारमा सहभागी नहुने भनिसकेको छ ।सरकारमा सामेल हुने यीनै तीनै पार्टीबीच समान रुपमा मन्त्रालय बाँडफाँड हुनुपर्ने शनिबार बसेको जसपाको यादव समूहका नेताहरुको भनाइ छ ।
समाचार स्रोतका अनुसार तीन दलबीच समान रुपमा मन्त्री बनाउदा एक दलको भागमा ७ मन्त्री पर्ने हुन्छ । र, जसपाको यादव समूहका नेताहरुले बैठकमा देउवा सरकारसँग ७ मन्त्रीसहित एक थान राज्यमन्त्री माग्नुपर्ने भनेका छन् ।
मन्त्रालय बाँडफाँटसँगै संविधान संशोधन, नागरिकता विधेयक, मधेस आन्दोलनका क्रममा लागेका मुद्धा फिर्ता र कार्यकर्ताको रिहाइको मुद्दा पनि सम्बोधन हुनुपर्ने यादव समूहको बैठकम छलफल भएको छ ।
ओली सरकारलाई बिदाई गरेर देउवा सरकार बनाउन तीन दलसहित राजमोको भूमिका रहेको थियो । जसअन्तर्गत नेपाली कांग्रेस, नेकपा माओवादी केन्द्र, जसपा र राजमोका एक सांसद रहेका थिए ।देउवा सरकार बन्नुअघि दुई समूहमा विभाजित जसपाको ठाकुर समूहले प्रधानमन्त्री केपी शर्मा ओलीले संसद् विघटन गर्दा ओली नेतृत्वको सरकारलाई साथ दिएको थियो । तर, यादव समूहले भने त्यसको विपक्षमा रहेर कांग्रेस, माओवादी र राजमोसँग मिलेर सर्वाेच्च अदालतमा मुद्धा दायर गरेको थियो ।
गठबन्धन बनेर दायर गरिएको मुद्धामा कांग्रेस सभापति देउवालाई प्रधानमन्त्री बनाउनुपर्ने मागसहित हस्ताक्षर पनि कायम रहेको थियो । फागुन २८ मा सर्वाेच्चले प्रधानमन्त्रीको असंवैधानिक कदम भन्दै गठबन्धनकै पक्षमा मुद्धाको फैसला गरेको थियो ।मुद्धा फैसला हुन्जेल जसपाको यादव समूहमा १२ जना सांसदको साथ रहे पनि सर्वाेच्चको फैसलापछि जसपाकै ठाकुर समूहका सांसदहरु यादव समूहतिर आएका छन् ।शनिबार बसेको संसदीय दलको बैठकमा ठाकुर समूह छाडेर पाँच सांसद यादव समूहमा आएको बताइएको छ भने अन्य सांसदहरु यादव समूहतिरै आउने क्रम जारी रहेको छ ।
