जनकपुरधाम — ओलमा फाउन्डेसन नेपालले हजरत पैगम्बर मुहम्मद साहबको जयन्तीको अवसरमा विगतझैँ मधेश प्रदेशभर सार्वजनिक बिदा कायम गर्न प्रदेश सरकारसँग माग गरेको छ।
फाउन्डेसनले मधेश प्रदेश सरकारको हालैको निर्णयप्रति ध्यानाकर्षण गराउँदै मुस्लिम समुदायमा मात्र सीमित बिदा दिने व्यवस्था समावेशी, लोकतान्त्रिक तथा धर्मनिरपेक्ष राज्यको भावना विपरीत रहेको जनाएको छ। संस्थाले विगतमा प्रदेशभर सार्वजनिक बिदा दिइँदै आएको स्मरण गराउँदै सोही व्यवस्था कायम राख्न आग्रह गरेको छ।
ओलमा फाउन्डेसन नेपालले माननीय गृहमन्त्रीमार्फत गृह, सञ्चार तथा कानुन मन्त्रालय, मधेश प्रदेशलाई बुझाएको ज्ञापनपत्रमा मधेश प्रदेश सामाजिक सद्भाव, समानता र सहअस्तित्वको प्रदेश भएकाले सरकारका निर्णयहरू पनि त्यही भावनाअनुरूप हुनुपर्ने उल्लेख गरेको छ।
फाउन्डेसनले सरकारको निर्णय पुनर्विचार गरी हजरत पैगम्बर मुहम्मद साहबको जयन्तीको अवसरमा विगतझैँ सम्पूर्ण प्रदेशभर सार्वजनिक बिदा घोषणा गर्न माग गरेको छ। साथै, उक्त निर्णयलाई विभेदकारी तथा अव्यावहारिक भन्दै तत्काल सच्याउन फाउन्डेसनको उपाध्यक्ष फारुक बरकाती, मुस्लिम अगुवा आशिक अलि, आबिद हुसैन लगाएतका अगुवाहरुले प्रदेश सरकारलाई ज्ञापनपत्र बुझाई आग्रह गरेको जनाएको छ।
प्रतिक्रिया दिनुहोस्