जनकपुरधाम / नेपाली कांग्रेसका उपसभापति तथा पूर्व उपप्रधानमन्त्री बिमलेन्द्र निधिले निर्वाचनको लागि तयार रहन कार्यकर्ताहरुलाई निर्देशन दिनुभएको छ ।
उहाँले प्रतिनिधिसभा विघटनको मुद्दा अदालतमा विचाराधीन रहेकाले सर्वोच्च अदालतले मध्यावधि चुनावमा जाने निर्णय गरे कांग्रेस चुनावमा जान तयार रहेको बताउनुभयो । जनकपुरधाम ४ स्थित पार्टी कार्यालयमा सोमवार आयोजित जिल्ला स्तरीय कार्यकर्ता भेलालाई सम्बोधन गर्दै उपसभापति निधिले भन्नुभयो,संघीय लोकतान्त्रिक गणतन्त्र र यो संबिधानको रक्षा गर्न पनि निर्वाचनमा भाग लिनुपर्छ , निर्वाचनको विरोध गर्नु भनेको अज्ञानता र अपरिपक्व हुन्छ । उहाँले अदालतबाट पुनःस्थापना वा निर्वाचनमात्र अहिलेको विकल्प रहेको बताउनुभयो ।
निधिले भन्नुभयो, ‘देश र जनतालाई प्रतिनिधिसभा चाहिएको छ। त्यसको संवैधानिक उपाय भनेको संसद पुनर्स्थापना वा निर्वाचन मात्रै हो, कांग्रेस दुबै विकल्पका लागि तयार छ ।’
उहाँले गणतन्त्र र संघीयता उल्टाउने कोसिस गर्नेहरू आफै परास्त हुने बताउनुभयो । उहाँले नेपालमा अब राजतन्त्र कहिल्यै नफर्किने बताउँदै राजतन्त्रको सपना हेर्नेहरुलाई यस्ता दिवा स्वप्न नहेर्न आग्रह गर्नुभयो।
नेता निधिले कम्युनिष्टहरु लोकतन्त्र विरोधी रहेकोले कम्यूनिष्ट सरकारले राज्यको शासकीय संरचना माथि नै धावा बोलेको बताउनुभयो । उहाँले कम्युनिष्टहरु संघिय लोकतन्त्र र गणतन्त्रका विरोधी भएको भन्दै उनीहरुमाथि कुनैपनि हालतमा विश्वास गर्न नसकिने बताउनुभयो ।
पूर्व गृहमन्त्री समेत रहेको नेता निधिले संसद विघटन गरेर प्रधानमन्त्री ओलीले अधिनायकवादी र वर्चश्ववादी कदम उठाएको भन्दै उहाँले निरन्तर यस कदमको विरोधमा जुट्न सबैलाई आग्रह गर्नुभयो ।
