अवतरणकै क्रममा पल्टियो हेलिकप्टर : खोटाङमा एयर डाइनेस्टीको ९ एन–एएफक्यू दुर्घटनाग्रस्त, एक जना घाइते

काठमाडौं । खोटाङमा एयर डाइनेस्टीको ९एन–एएफक्यू नम्बरको हेलिकप्टर बुधबार मध्यान्ह दुर्घटनाग्रस्त भएको छ । काठमाडौंबाट उडेको उक्त हेलिकप्टर अवतरणकै क्रममा पल्टिँदा एक जना यात्रु घाइते भएका छन् भने अन्य यात्रु र चालक दल सकुशल रहेका छन् ।
प्राप्त जानकारीअनुसार हेलिकप्टर बिहान करिब ११ बजे काठमाडौंबाट पाँच जना यात्रु बोकेर खोटाङका लागि उडेको थियो । निर्धारित गन्तव्यतर्फ उडेको उक्त हेलिकप्टर केपिलासगढी गाउँपालिका–२ अन्तर्गत पर्ने खार्ताम्छाको बालाबेसी क्षेत्रमा अवतरण गर्ने क्रममा ११ बजेर ५१ मिनेटमा दुर्घटनामा परेको हो ।
स्थानीय जनप्रतिनिधिका अनुसार हेलिकप्टर जमिनमा अवतरण गर्ने क्रममा सन्तुलन गुमाएर पल्टिएको थियो । घटनास्थल दुर्गम तथा पहाडी भू–भागमा पर्ने भएकाले अवतरण चुनौतीपूर्ण रहेको बताइएको छ । प्रारम्भिक अनुमानअनुसार मौसम, भू–भाग र अवतरण प्रविधिसम्बन्धी कारणले दुर्घटना हुन सक्ने आँकलन गरिएको छ, यद्यपि आधिकारिक कारण भने खुल्न बाँकी रहेको छ ।
दुर्घटनामा काठमाडौं निवासी काजीबहादुर राई सामान्य घाइते भएका छन् । उनको दाहिने खुट्टामा चोट लागेको केपिलासगढी गाउँपालिका–२ का वडाध्यक्ष मिलनकुमार राईले जानकारी दिएका छन् । अन्य यात्रुहरू भने सकुशल रहेको उनले बताए । घाइते राईलाई तत्काल उद्धार गरी अर्को हेलिकप्टरमार्फत काठमाडौं ल्याइएको छ ।
हेलिकप्टरमा नागमणि राईसहित उनका परिवारका सदस्यहरू सवार रहेका थिए । यात्रुहरूमा उनका छोरा बालकुमार राई, छोरी सम्झना राई, आफन्त लक्ष्मी राई र काजीबहादुर राई रहेका थिए । उनीहरू पारिवारिक शोकका कारण खोटाङ जाँदै थिए ।
जानकारी अनुसार नागमणि राईकी श्रीमती मनमछी राईको बेलायत (यूके) मा निधन भएको थियो । उनको शव नेपाल ल्याइएको भए पनि हेलिकप्टरमा यात्रु संख्या पूरा भएपछि शव राख्ने स्थान अभाव भएको कारण शव छुट्टै शवबहानमार्फत पठाइएको थियो । परिवारका सदस्यहरू भने हेलिकप्टरमार्फत अघि बढेका थिए ।
वडाध्यक्ष मिलनकुमार राईका अनुसार, “हेलिकप्टरमा पाँच जना चढेपछि शव राख्ने ठाउँ भएन । त्यसैले शव गाडीमार्फत पठाइएको थियो । उहाँहरू भने हेलिकप्टरमा आउनु भएको थियो । अवतरण गर्ने क्रममा हेलिकप्टर पल्टियो ।”
उनका अनुसार मृतक मनमछी राईको शव भने बिहीबार मात्रै खोटाङ आइपुग्ने अपेक्षा गरिएको छ । घटनाले शोकमा डुबेको परिवारमा थप पीडा थपिएको स्थानीयले बताएका छन् ।
यसैबीच, नेपाल नागरिक उड्डयन प्राधिकरण (क्यान) ले पनि उक्त घटनाबारे पुष्टि गरेको छ । क्यानद्वारा जारी सूचनामा काठमाडौंबाट खोटाङ उडेको एयर डाइनेस्टीको हेलिकप्टर अवतरण गर्ने क्रममा पल्टिएर दुर्घटनामा परेको उल्लेख गरिएको छ ।
क्यानका अनुसार हेलिकप्टरमा सवार सबै यात्रु र चालक दल सुरक्षित रहेका छन् भने एक जना यात्रु सामान्य घाइते भएका छन् । घाइतेलाई तत्काल उद्धार गरी काठमाडौं ल्याइएको र उनको अवस्था खतरामुक्त रहेको जनाइएको छ ।
घटनापछि स्थानीयवासी, सुरक्षाकर्मी र सम्बन्धित निकाय घटनास्थलमा पुगेका थिए । हेलिकप्टर दुर्घटनाग्रस्त भए पनि ठूलो मानवीय क्षति नभएकाले राहत महसुस गरिएको स्थानीयले बताएका छन् । यद्यपि हेलिकप्टरमा क्षति पुगेको छ ।
हेलिकप्टर दुर्घटनापछि उड्डयन क्षेत्रको सुरक्षामाथि पुनः प्रश्न उठेको छ । विशेष गरी दुर्गम तथा पहाडी जिल्लामा हुने हेलिकप्टर उडानमा उच्च सतर्कता अपनाउनुपर्ने विज्ञहरूले बताउँदै आएका छन् । अवतरणका लागि उपयुक्त पूर्वाधार, मौसमको स्पष्ट जानकारी र प्राविधिक तयारी अपरिहार्य हुने उनीहरूको भनाइ छ ।
नेपालमा पछिल्ला वर्षहरूमा हेलिकप्टर सेवा दुर्गम क्षेत्रका लागि महत्वपूर्ण यातायात साधनका रूपमा स्थापित भए पनि दुर्घटनाका घटनाहरू समय–समयमा दोहोरिँदै आएका छन् । विशेष गरी खराब मौसम, कठिन भौगोलिक अवस्था र प्राविधिक कमजोरी दुर्घटनाका मुख्य कारणका रूपमा देखिँदै आएका छन् ।