जनकपुरधाम । नेकपा एमाले धनुषामा चरम विवाद देखिएको छ । विवादका कारण १६ पालिकामा अधिवेशन हुन सकेको छैन् ।
कात्तिक ९ मा एमाले अध्यक्ष केपी शर्मा ओलीले काठमाण्डुस्थित केन्द्रीय कार्यालयबाटै भर्चुअल माध्यमबाट ७५३ वटै पालिकाको अधिवेशन उद्घाटन गरेको भनिएको थियो । तर सो दिन धनुषाका २ पालिकाले मात्र अधिवेशन गर्यो । १६ पालिकाको अधिवेशन अभैm अनिश्चित छ । एमाले धनुषा अध्यक्ष राजकिशोर यादवले बटेश्वर गाउँपालिका र मिथिला नगरपालिकामा अधिवेशन सम्पन्न भएको बताए । उनका अनुसार बटेश्वर गाउँपालिका अध्यक्षमा रामखेलावन महतो निर्वाचित भएका छन् ।
उनको अध्यक्षतामा ६५ सदस्यीय कार्य समिति चयन गरिएको छ । यस्तै मिथिला नगरपालिकामा दीपक थापालाई अध्यक्ष बनाइएको छ । थापाको संयोजकत्वमा ७५ सदस्यीय कार्य समिति चयन भएको बताइएको छ । बटेश्वर र मिथिला बाहेकका पालिकामा अधिवेशन गर्ने तयारी भइरहेको जिल्ला अध्यक्ष यादवले जानकारी दिए । केही वडामा पनि अधिवेशन नभएका कारण पालिकाको अधिवेशन ढिलो हुने देखिएको छ । धनुषामा १६९ वडा छ, जसमध्ये १३० वडामा मात्र अधिवेशन सम्पन्न भएको छ ।
३९ वडामा विवाद देखिएको छ । ती वडाहरुका अधिवेशन अनिश्चित बनेको छ । केही वडाको अधिवेशन नभएको, सदस्यता नवीकरण नभएको जस्ता प्राविधिक समस्याले पालिका अधिवेशनमा ढिलाई भएको जिल्ला अध्यक्ष यादवले बताए । उनले भने, ‘केही प्राविधिक कठिनाइले १६ पालिकाको अधिवेशन हुन सकेन् , छिट्टै अधिवेशन हुन्छ ।’
