सप्तरी, ९ माघ । मधेश प्रदेश पहिचानका आधारमा प्रदेशको नामकरण ठुलो उपलब्धी रहेको अर्थमन्त्री शैलेन्द्रप्रसाद साहले बताएका छन् । सप्तरीको रुपनी गाउँपालिका–१ शास्त्रीनगरस्थित पण्डित रामकुमार शास्त्री गौ सेवाआश्रमको नवनिर्मित भनव उद्घाटन गर्दै उनले यस्तो बताएका हुन् ।
मधेश प्रदेश ‘अझैं हाम्रो आन्दोलन जारी छ, राज्यद्वारा मधेशलाई ५ टुक्रामा बाँडिएको छ, अहिलेको संरचनामा मधेशलाई ५ टुक्रामा बाँडिएको छ, यसमा सहमत छैनौं’ उनले भने–‘सुरुमा हामीले २२ जिल्लालाई स्वायत मधेश एक प्रदेश, त्यसपछि विभिन्न आन्दोलन भए र हामीले मधेश र थरुहट प्रदेश बनाउने माग लिएर अघि बढे ।’
ती कुरालाई राज्य पुर्नसंरचना आयोगले स्वीकार गरेतापनि राज्यले नमानेको उनले बताए । ‘तर हाम्रो आन्दोलन जारी छ र विगतमा हामीले जून कुराको लागि आन्दोलन गर्यौ, त्यो यो मात्रै एउटा प्रदेश हो, जून पहिचानको आधारमा बनेको छ’ उनले भने–‘यसले अन्य प्रदेशवासीले पनि लिम्वुवान, खुम्बुवान सहित पहिचानको लागि आन्दोलन गर्न गइरहेका छन् ।’
उनले मुलुकमा पहिचान र स्वाभिमानको माग तिब्र रुपले बढेको बताए । ‘आठ जिल्ला समेटेर बनेको मधेश प्रदेश एक उदाहरणिय र ठुलो उपलब्धी हो, बाँकी जिल्लालाई पनि मधेश प्रदेशमा ल्याउने अभियान जारी छ ।’ उनले भने ।
अर्को प्रसंगमा बोल्दै सरकारका प्रवक्ता समेत रहेका मन्त्री साहले प्रदेशको विकासका लागि गौरवका आयोजनाहरु मधेश सरकारको प्राथमिकतामा रहेको बताए ।
पण्डित रामकुमार शास्त्रीद्वारा स्थापित गौशाला संचालनका लागि प्रदेश सरकारले उपलब्ध गराएको २९ लाख ५० हजार र शास्त्री स्वमको ६ लाख गरी सो भवन निर्माण गरिएको छ । हाल सो गौ सेवाआश्रममा ५१ वटा गाई छन् ।
गौशाला आश्रम निर्माण समितिका संयोजक समेत रहेका पण्डित शास्त्रीको अध्यक्षतामा आयोजित कार्यक्रममा मधेश प्रदेश आमसंचार प्रतिष्ठानका अध्यक्ष श्यामसुन्दर यादव, रुपनी गाउँपालिका अध्यक्ष हरेराम यादव, प्रेस काउन्सीलका पूर्व सदस्य मुरली प्रसाद यादव, पत्रकार महासंघका राष्ट्रिय परिषद् सदस्य मनोजकुमार माझी, समाजसेवी हरेकृष्ण प्रसाद सिंह, पूर्व जनस्वास्थ्य निरिक्षक भागवत प्रसाद यादवले पनि शुभकामना दिँदै गौं संरक्षणमा जोड दिए ।
सोही कार्यक्रममा गौ रक्षाका निम्ति स्थानीय भागवतप्रसाद यादवले आजीवन दैनिक १ रुपैयाँको दरले उपलब्ध गराइने घोषणा समेत गरे ।
