जनकपुरधाम, असोज २७ । जनता समाजवादी पार्टी नेपालका अध्यक्ष उपेन्द्र यादवले मुलुक अन्यौलता र अनिश्चितताको भूमरीमा फकेको बताएका छन ।
जसपा नेपाल मधेश प्रदेश समितिको प्रथम अधिवेशनको उद्घाटन सत्रलाई सम्बोधन गर्दैै अध्यक्ष यादवले काँग्रेसको कम्युनिष्टहरुको लुटतन्त्र विरुद्ध भएको जेनजी विद्रोह पछि अन्तरिम सरकार गठन भएपनि मुलुक अन्यौलता र अनिश्तिता बाट निस्कन नसकेको बताए ।
आवश्यकताको सिद्धान्तको आधारमा गठन भएको अन्तरिम सरकारको मुख्य दायित्व ६ महिना भित्र निर्वाचन गराउनु रहेको उल्लेख गर्दै अध्यक्ष यादवले भने ,‘ यो सरकारले निर्धारित समयमा चुनाव गराउन सक्छन की सक्दैनन भने अन्यौलता जनतामा व्याप्त छ । सरकारले निर्वाचनको बाटोमा अघि बढेकै छैन । ’
राजनीतिक दलहरुको सहभागिता विना निर्वाचन हुन नसक्ने उल्लेख गर्दै अध्यक्ष यादवले सरकारले दलहरु संग छलफल समेत अघि नबढाएको प्रति असन्तुष्टि व्यक्त गरेका छन । उनले भने,‘ दलहरुको सहभागिता विना निर्वाचन सम्भव छैन , सरकारले बलजफ्ती गराउने प्रयास गरे त्यो निर्वाचन ज्ञानेन्द्रको निर्वाचन भन्दा फरक हुदैन । त्यसले देशले निकास पाउन सक्दैन । बरु अझ द्वन्दमा फसने छ । तसर्थ अविलम्ब दलहरु संगको सम्बादलाई अघि बढाउनु पर्छ । ’
समयमै निर्वाचन हुने प्रति जनता विश्वस्त हुन नसकेकै कारण थप अन्यौलता र अनिश्तिता सृजना भएको उनको कथन थियो ।
अर्को प्रसंगमा अध्यक्ष यादवले जेनजी आन्दोलन भनेको प्रत्यक्ष निर्वाचित कार्यकारी प्रमुखको व्यवस्था वर्तमान संविधानले सम्भव नरहेकाले दलहरुको सहकार्यमा तत्काल संविधानको पुर्नलेखन हुनु पर्ने बताए ।
७५ जना युवाहरुले बगाएको रगतको सम्मानका लागि पनि संविधान संशोधन वा पुर्नलेखन गरेर प्रत्यक्ष निर्वाचित कार्यकारी प्रमुख, पुर्ण समानुपाति निर्वाचन प्रणाली व्यवस्था आवश्यक रहेको उनको कथन थियो ।
नेपालमा संसदीय व्यवस्था असफल भइ सकेको उल्लेख गर्दै अध्यक्ष यादवले मधेश विद्रोहले शुरु देखीनै आवाज उठाउदै आएको प्रत्यक्ष निर्वाचन प्रणाली विकल्प अव नरहेको समेत बताए ।
उनले प्रदेशमा पनि प्रत्यक्ष कार्यकारी प्रमुख र पूर्ण समानुपातिक प्रदेशसभा हुनु पर्ने उल्लेख गर्दै भने ,‘यस प्रणालीले विज्ञहरुको सरकार र कानून निर्माण तथा बजेट पारित गर्न संसद केन्द्रित हुनेछ ।
प्रदेश अध्यक्ष बालकिशोर यादवको अध्यक्षतामा भएको उद्घाटन सत्रमा सह अध्यक्ष रकम चेम्जोङ्ग, उपाध्यक्ष, महासचिव , सचिव लगायतका वक्ताहरु शुभकामना मन्तव्य राखेका थिए ।
भोली सम्म चल्ने भनिएको प्रदेश अधिवेशनले अध्यक्ष सहित ५१ सदस्यी नयाँ कार्य समिति चयन गर्ने छन । अधिवेशनमा पाँच सय प्रतिनिधि सहभागी रहेको छ ।
