जनकपुरधाम, जेष्ठ ०८ गते। मधेश प्रदेशमा नयाँ सत्ता समीकरण बनेसँगै नेपाली कांग्रेस, नेकपा (एमाले) र नेकपाको संयुक्त सरकार गठन भएको छ। नयाँ राजनीतिक सहमतिपछि मुख्यमन्त्री कृष्णप्रसाद यादवले आज प्रदेशसभाबाट विश्वासको मत लिन लागेका हुन्।
नयाँ समीकरणअनुसार जनता समाजवादी पार्टी (जसपा) नेपाल र जनमत पार्टी सरकारबाट बाहिरिएका छन्। जनमत पार्टीले यसअघि नै सरकारलाई दिएको समर्थन फिर्ता लिएको थियो भने बिहीबार उसका मन्त्रीहरूले राजीनामा दिएका थिए। त्यसपछि मुख्यमन्त्री यादवले मन्त्रिपरिषद् पुनर्गठन गर्दै एमालेलाई सरकारमा सहभागी गराएका हुन्।
एमालेका तर्फबाट मोहम्मद समिम विना विभागीय मन्त्रीका रूपमा सरकारमा सहभागी भएका छन्। उनले बिहीबार नै पद तथा गोपनीयताको शपथ ग्रहण गरेका थिए। विश्वासको मत प्राप्त गरेपछि मन्त्रिपरिषद्लाई पूर्णता दिने तयारी गरिएको बताइएको छ।
केन्द्रमा कांग्रेस, एमाले र नेकपाबीच भएको राजनीतिक समझदारीअनुसार प्रदेश सरकारहरूमा समेत नयाँ समीकरण बनाउने सहमति भएपछि मधेश प्रदेशमा पनि सत्ता फेरबदल भएको हो। यसअघि सरकारमा रहेका मधेशवादी दलहरू बाहिरिएपछि प्रदेशको राजनीति थप तरंगित बनेको छ।
