धनुषाको मिथिला नगरपालिका–९ बेंगाडावरस्थित डाँडाटोलमा आयोजित कृषि सामग्री वितरण कार्यक्रममा बोल्दै मन्त्री साहले किसानलाई परिचयपत्र मार्फत मल, विउ, कृषि उपकरण, कृषि ऋण लगायतका सुविधाहरु सहजै लिन सकिने बताए । परिचयपत्रकै आधारमा प्रदेश सरकारले किसानलाई सुलभ दरमा ऋण उपलब्ध गराउने पनि उनले जनाए ।
उनले यस भेगमा किसानले उत्पादन गरेको कृषि उपभोग्य वस्तु राख्न किसानकै सहयोगमा ५० प्रतिशत अनुदानमा कोल्ड रुम निर्माण गर्न प्रदेश सरकार तयार रहेको उल्लेख गरे ।कृषि उत्पादनमा किसानलाई कुनै पनि बाहानमा घाटा लाग्न नदिन प्रदेश सरकारले विभिन्न योजनाहरु ल्याउन लागिएको मन्त्री साहले सुनाए ।
नेपाललाई कृषि प्रधान देश भनिएपनि व्यवहारमा भने महशुस नभएको उनको भनाई थियो । कृषि प्रधान देश भएको भए किसानलाई आज यो दिन देख्न पर्दैनथ्यो । किसानलाई यी समस्याहरु आउँदैनथे । किसानहरुको समस्या समाधानका लागि तीन तहकै सरकारबीच समन्वयको विकल्प नरहेको उनले थपे ।
प्रदेश २ मा ८० प्रतिशतभन्दा बढि नागरिक कृषिमा निर्भर रहेका कारण किसानको समृद्ध नभएसम्म यो प्रदेशको समृद्ध नहुने उनले दावी गरे |प्रदेश सरकार कृषि, उद्योग र पर्यटनलाई प्राथमिकतामा राखेर अघि बढिरहेको बताए । तीन तहकै सरकारले कृषिलाई प्राथमिकतामा राख्नुपर्नेमा मन्त्री साहले जोड दिए ।
मिथिला नगरपालिका–९ बेंगाडावरस्थित डाँडाटोलमा तरकारी पकेट सञ्चालक समिति तथा फुलवारी कृषक समुहद्वारा आयोजित कार्यक्रममा कृषि समाग्री वितरण गरिएको हो । ५० प्रतिशत अनुदानमा उपलब्ध गराईएको कृषि समाग्री मन्त्री साहले किसानलाई वितरण गरेका हुन् ।
वितरण गरिएको समाग्रीहरुमा ओल धुने मेसिन, २’’ मोटर, १’’ मोटर, ठेला गाडा, स्पेयर, करेट, कोदालो, खुर्पी, पाइप, पल्चिङ्ग प्लाष्टिकलगायतका रहेका छन् । ती समाग्रीहरु कृषि ज्ञान केन्द्र धनुषाको सहयोगमा उपलब्ध गराईएको हो । कृषिमन्त्री साहले मिथिला नगरपालिका–९ मा रहेको मिथिला ड्रागन फ्रुट फर्मको अवलोकन समेत गरेका हुन् ।
कृषि समाग्री वितरण कार्यक्रममा कृषि ज्ञान केन्द्र धनुषाका अध्यक्ष शंकर प्रसाद साह, मिथिला नगरपालिका वडा नं ९ का वडाध्यक्ष दिपकजंग थापा, ईलाका प्रहरी कार्यालय ढल्केवरका प्रहरी निरिक्षक तीर्थ कुमार कार्की, मिथिला नगरपालिकाका कृषि विकास शाखाका शाखा अधिकृत संजय कुमार महतोलगातका अतिथी तथा स्थानिय किसानहरुको उपस्थिती रहेको थियो ।
