जनकपुरधाम । समाजमा बढ्दो जोखिम संचार व्यवस्थापन गर्न किशोर किशोरी र युवाहरुलाई सक्रिय गर्नुपर्ने आवश्यक्ता औंल्याइएको छ ।
समाज हुने गरेको अनावश्यक होहल्ला व्यवस्थापन सम्बन्धी किशोकिशोरी र युवाहरु सक्रिय हुनुपर्नेमा विज्ञहरुले जोड दिएका छन् । सेभ द चिल्डे्रनको आर्थिक तथा प्राविधिक सहयोगमा आसमान नेपालले आयोजना गरेको कोभिड-१९ सम्बन्धी जोखिम संचार र सामुदायिक सहभागिता विषयक दुई दिने कार्यशाला गोष्ठीमा विज्ञहरुले सामाजिक स्तरमा हुने होहल्ला, अनावश्वयक प्रचारप्रसार व्यवस्थापनको जिम्मा अव युवा पुस्ताले लिनुपर्नेमा जोड दिए ।
कोभिड-१९ विरुद्धको खोप प्रयोगमा वृद्धि गराउने उद्येश्यले मंगलबारदेखि जनकपुरमा शुरु भएको कार्यशाला गोष्ठीमा धनुषा, महोत्तरी र सप्तरी जिल्लाका बाल क्लव तथा युवा क्लवका पदाधिकारी र प्रतिनिधिहरुको सहभागिता रहेको छ । तीनै जिल्लाबाट २६ जनाको सहभागिता रहेको कार्यशाला गोष्ठीमा सेभ द चिल्ड्रेनका सामाजिक व्यवहार परिवर्तन विज्ञ आयुष जोशीले प्रशिक्षण दिएका थिए ।
सहभागीहरुलाई प्रशिक्षण दिदै विज्ञ जोशीले सामाजिक रुपान्तरणमा युवाहरुको भूमिका महत्वपूणर् रहेकोले जोखिम संचार व्यवस्थापनमा पनि योगदान गर्नुपर्नेमा जोड दिए ।
नकारात्मक सूचना प्रवाहले समाजमा द्वन्दको अवस्था सिर्जना भएकोले यसप्रति सचेत हुन सहभागीहरुलाई जानकारी गराए ।
कोभिड-१९ खोप बारे समाजमा देखिएको त्रास न्युनिकरणमा पनि किशोर किशोरीहरुले सत्यतथ्य सूचना प्रवाह गर्नुपर्नेमा विज्ञ जोशीले जोड दिए । गोष्ठीमा जोखिम संचार र सामुदायिक सहभागिता अधिकृत अनिष पौडेलले सहजिकरण गरेका थिए ।
यी जिल्लाहरुमा कोभिड-१९ को जोखिम कम गर्न बाल क्लव र युवा क्लवकहरुलाई समेत सामुदायिक स्तरमा सहभागिता गराउने भएको छ । कोभिड-१९ सम्बन्धी भ्रम न्युनिकरण, खोपको प्रयोगमा वृद्धि र खोप अभियानलाई अघि बढाउन सहयोग पुग्ने लक्ष्य लिएको छ ।
