काठमाडौं । महानगरीय प्रहरी वृत्त, नागढुंगाले लागूऔषध सम्बन्धी मुद्दामा पक्राउ गरेका थुनुवा प्रहरी अधिकृतकै अगाडिबाट फरार भएका छन् । थानकोटका प्रहरी निरीक्षक रामप्रसाद सापकोटा नेतृत्वको प्रहरी टोलीसँग ललितपुरको पाटन गएका वेला छक्काउँदै सर्लाहीका मोहम्मद इल्ताज भागेका हुन् ।
अनुसन्धानका क्रममा उनले पाटनमा लागूऔषधको मुख्य कारोबारी रहेको इन्स्पेक्टर सापकोटासहितको टोलीलाई बताएका थिए । त्यसपछि लागूऔषध कारोबारका नाइकेलाई खोज्दै सापकोटा इल्ताजलाई लिएर पाटन गएका थिए । तर, त्यहाँबाट प्रहरीलाई छक्याएर उनी भागेको पाइएको छ ।
इल्ताजको हत्कडीसमेत प्रहरीले खोलिदिएको पाइएको छ ।काठमाडौंका प्रहरी प्रमुख एसएसपी अशोक सिंहले घटनाबारे छानविन थालिएको बताए ।
शनिबार बिहान महोत्तरीबाट काठमाडौं आउँदै गरेको ना ७ ख ५३६० को बस चेकजाँच गर्ने क्रममा इल्ताज एक हजार बढी नाइट्रोभेट, डाइजेपाम, फेनारगन र नुर्फिनसहित पक्राउ परेका थिए ।
