जनकपुरधाम। लेखक सुरेश कुमार यादव तथा प्रकाशक विरेन्द्र कुमार साहद्वारा प्रकाशित “स्टार वडा अध्यक्ष” नामक पुस्तकको आज एक विशेष समारोहबीच विमोचन गरिएको छ।
मधेश प्रदेशका माननीय सभामुख राम आशिष यादवको प्रमुख आतिथ्यमा आयोजित कार्यक्रममा उक्त पुस्तकको औपचारिक विमोचन गरिएको हो। कार्यक्रममा विभिन्न क्षेत्रका बुद्धिजीवी, साहित्यकार, समाजसेवी तथा राजनीतिक व्यक्तित्वहरूको उपस्थिति रहेको थियो।
विमोचन समारोहलाई सम्बोधन गर्दै सभामुख यादवले पुस्तकले स्थानीय शासन, नेतृत्व तथा जनप्रतिनिधिहरूको भूमिका सम्बन्धी विषयवस्तुलाई उजागर गर्ने विश्वास व्यक्त गरे। उनले समाज रूपान्तरण र जनचेतना अभिवृद्धिमा साहित्यको महत्वपूर्ण भूमिका रहने उल्लेख गर्दै लेखक तथा प्रकाशकलाई सफलताको शुभकामना दिएका थिए।
लेखक सुरेश कुमार यादवले पुस्तक लेखनको उद्देश्य स्थानीय तहका जनप्रतिनिधिहरूको योगदानलाई दस्तावेजीकरण गर्नु रहेको बताए। प्रकाशक विरेन्द्र कुमार साहले पुस्तकले पाठकलाई स्थानीय नेतृत्वको महत्व बुझ्न सहयोग पुग्ने विश्वास व्यक्त गरे।
कार्यक्रममा सहभागीहरूले पुस्तकको सफलताको शुभकामना व्यक्त गर्दै यस्ता सिर्जनात्मक कृतिहरूले समाजमा सकारात्मक सन्देश प्रवाह गर्ने धारणा राखेका थिए।
प्रतिक्रिया दिनुहोस्