आमिन राईन
जनकपुरधाम, मंसिर १३ गते
जनता समाजवादी पार्टी नेपालका अध्यक्ष उपेन्द्र यादवले देशमा पटक–पटक राजनीतिक परिवर्तन भए पनि अपेक्षित आर्थिक र सामाजिक रुपान्तरण हुन नसकेको बताएका छन्।
शनिबार जनकपुरधाममा दलित, पिछडावर्ग, थारु, आदिवासी तथा अल्पसंख्यक (डोटिम) परिसंघ धनुषाद्वारा आयोजित जिल्ला स्तरीय वृहत अन्तरक्रिया कार्यक्रममा सम्बोधन गर्दै उनले केवल राजनीतिक परिवर्तनले मात्र मुलुक समृद्ध नहुने स्पष्ट पारे।
अध्यक्ष यादवका अनुसार सामाजिक र आर्थिक क्षेत्रमा ठोस परिवर्तन नभएसम्म परिवर्तनको प्रभाव जनजीवनमा महसुस हुने छैन।
“अबको क्रान्ति आर्थिक र सामाजिक रुपान्तरणका लागि हुनुपर्छ, त्यसको नेतृत्व डोटिम परिसंघले लिनुपर्छ,” उनले भने।
समाजको तल्लो तहमा रहेका समुदायहरूको अवस्था सुधार बिना राजनीतिक उपलब्धिले अर्थ नबोक्ने उल्लेख गर्दै यादवले समाजमा रहेको विकृति–विसंगति अन्त्य नगरी लोकतन्त्र बलियो हुन नसक्ने बताए।
दलित, पिछडावर्ग, थारु तथा अन्य अल्पसंख्यक समुदायलाई सत्ताको संरचना र निर्णय प्रक्रियामा पहुँच दिलाउनुपर्ने आवश्यकता औंल्याउँदै उनले समान अधिकारका लागि सामूहिक शक्ति अत्यन्त जरुरी रहेको उल्लेख गरे।
छुट्टाछुट्टै संघर्षले लक्ष्य हासिल गर्न नसक्ने बताउँदै यादवले डोटिम परिसंघलाई सामूहिक शक्तिको साझा मञ्चका रूपमा अघि बढ्न आग्रह गरे।
