धनगढी , २४ पुष । प्रधानमन्त्री केपी शर्मा ओलीले पुष्पकमल दाहाल प्रचण्डलाई काम लाग्छ भनेर पार्टीमा ल्याएको र दुई पार्टीबीच एकता गरेको दावी गर्नुभएको छ ।
कैलालीको धनगढीमा आयोजित आफु निकट नेकपा सुदूरपश्चिम भेलालाई सम्बोधन गर्दै प्रधानमन्त्री ओलीले प्रचण्ड शिक्षक भएर काम गरिरहदा आफु जेल परिसकेको बताउनुभयो ।
उहाँले प्रचण्डले आफुविरुद्ध गलत भ्रम छरेको भन्दै आफुले प्रचण्ड भन्दा ३ वटा मात्र होइन दर्जनौ भोटो अघि नै फटाएको बताउनुभयो ।
आफ्नो विगत र उत्थान नविर्सन आग्रह गर्दै उहाँले माधवकुमार नेपाल अहिले आफु वरिष्ठ हुँ र ओली भन्दा पनि अगाडि राजनीति थालेको भन्नु हाँस्यास्पद भएको बताउनुभयो ।
आफूले नै राजनीतिमा आउन आग्रह गरेको स्मरण गर्दै नेपाल आफु जेल पर्दा केन्द्रीय सदस्य र पोलिटव्युरोमा रहेको भन्दै वरिष्ठताको दावी गरिरहेको बताउनु झुठको पुलिन्दा भएको बताउनुभयो ।
प्रधानमन्त्री ओलीले प्रतिनिधिसभा अब चुनावबाट आउँने बताउँद अगाडि भन्नुभयो ‘ केपी ओलीले चुनाव गराउँदैन भनिदैछ तर म भन्छु चुनाव बैशाख १७ र २७ गते नै हुन्छ, निर्वाचन आयोगले तयारी थालिसकेको छ ।’
गलत र भ्रष्ट तत्व, देशद्रोही, विदेशीको इशारामा काम गर्नेहरुलाई गाउँगाउँमा नपठाउँन आग्रह गर्दै प्रधानमन्त्री ओलीले त्यस्ताहरुलाई भोट नहाल्न समेत आग्रह गर्नुभयो ।
जातीय फुट ल्याउन खोज्ने, देशमा विखण्डन ल्याउन खोज्नेहरुप्रति सचेत रहन आग्रह गर्दै उहाँले आफ्नो स्वास्थ्य देशका लागि र जनताका लागि भएको पनि बताउनुभयो ।
आफ्नो मन्तव्यको सुरुवातमा सुदूरपश्चिमको विकासको सम्भावनाको बारेमा चर्चा गर्नु भएका ओलीले आफ्नो सरकारले सुदूरपश्चिमको मुहार नै अर्को बनाउने कार्यक्रम ल्याएको दावी पनि गर्नुभयो ।
