काठमाडौं,
गत वर्ष १६ चैतमा सरकारले कोरोना भाइरस नियन्त्रण तथा रोकथाममा खटिएका सुरक्षाकर्मीलाई समेत भत्ता दिने निर्णय ग¥यो । ९ महिना बित्दा पनि उनीहरुलाई भत्ता त दिइएको छैन न यो बीचमा कोराना संक्रमित प्रहरीले बीमाको भुक्तानी समेत पाउन सकेका छैनन् ।
नेपाल प्रहरी, नेपाली सेना र सशस्त्र प्रहरीका १४ हजार भन्दा धेरै कर्मचारी संक्रमित भएका छन् । तर, एक जनाले पनि बीमा वापतको रकम पाएका छैनन् । सबै सरकारी कर्मचारीको राष्ट्रिय बीमा कम्पनीमा कोरोना बीमा गरिएको थियो । पर्याप्त पैसा नभएको भन्दै समितिले भुक्तानी दिएको छैन ।
नेपाल प्रहरीमा ६ हजार ९ सय ७७ जनामा संक्रमण भइसकेको छ । जसमध्ये सक्रिय संक्रमित ६ सय ५३ जना आइसोलेसनमा छन् भने ६ हजार तीन सय २१ निको भइसकेका छन् । संक्रमित भएका कर्मचारीको बीमाको भुक्तानी आउने प्रक्रियामै रहेको नेपाल प्रहरीका प्रवक्ता एसएसपी बसन्तबहादुर कुँवरले बताए ।
नेपाली सेना तथा सशस्त्र प्रहरीका संक्रमितले पनि बीमाको भुक्तानी पाएका छैनन् । नेपाल सेनामा ४ हजार ८ सय २० जनामा संक्रमण भएकोमा चार हजार पाँच सय ३ जना निको भइसकेका छन् । त्यस्तै सशस्त्र प्रहरीका एक हजार ९ सय ६९ संक्रमित भएकोमा एक हजार ८ सय ८५ जना निको भइसकेका छन् । तीनै निकायका एक जनाले पनि बीमा भुक्तानी पाएका छैनन् । अर्थ मन्त्रालयले पटक पटक समयमै भुक्तानी दिन निर्देशन दिएपनि सरकारको लगानी रहेको बीमा कम्पनीले भुक्तानी दिएको छैन ।
जोखिम भत्ता पनि अन्योलमै
सरकारले अधिकतम १० प्रतिशत सुरक्षाकर्मीलाई चार महिनाको जोखिम भत्ता दिने बताएपनि त्यसको कुनै प्रक्रिया सुरु भएको छैन ।
गत ८ मंसिरमा राजपत्रमा प्रकाशित ‘सार्वजनिक खर्चमा मितव्ययिता कायम गर्ने सम्बन्धि मादपण्ड २०७७’मा अधिकतम १० प्रतिशत सुरक्षाकर्मीलाई जोखिम भत्ता दिइने उल्लेख छ । तर अर्थले त्यसअनुसार बजेट पठाएको छैन । मापदण्डमा भनिएको छ,‘कोभिड १९ को संक्रमण रोकथाम, नियन्त्रण तथा उपचारमा अग्रपंक्तिमा खटिने सुरक्षाकर्मीमध्ये कार्यरत संख्याको १० प्रतिशत नबढ्ने गरी २०७६ चैत १६ गतेदेखि बन्दाबन्दी कायम भएको अवधि अर्थात् २०७७ साल श्रावण ६ गतेसम्मको प्रोत्साहन रकम नेपाल सरकारको २०७६ चैत १६ गतेको निर्णयअनुसार खटिएका सुरक्षाकर्मीको जोखिम वर्गीकरणसहितको अभिलेख सम्बन्धित सुरक्षा निकायबाट प्रमाणित गरी प्राप्त भएपछि अर्थ मन्त्रालयले स्रोतको उपलब्धताको आधारमा निकासा दिन बाधा पर्ने छैन,’ भन्ने उल्लेख छ । सोहीअनुसार नेपाल प्रहरीले विवरण संकलन गरेपनि नेपाली सेना र सशस्त्र प्रहरीमा अन्योल नै छ ।
यसअघि पनि विवरण तीनै वटा सुरक्षाकर्मीले पठाएकोमा ठूलो संख्यामा सुरक्षाकर्मी खटिएको देखाएपछि अर्थ मन्त्रालयले भत्ता दिन नसकिने जनाएको थियो ।
कोभिड १९ संक्रमण रोकथाम तथा नियन्त्रणमा खटिएका सुरक्षाकर्मीले तीन प्रकारको भत्ता दिने निर्णय भएको थियो । प्यासेन्ट रिसिभिङ टिम तथा पीपीई लगाएर काम गर्ने सुरक्षाकर्मीलाई सुरु तलबमानको शतप्रतिशत भत्ता पाउनेछन् । पीपीई लगाउनु नपर्ने, पेसेन्ट रिसिभि टिममा खटिई सहयोग गर्ने र क्वारेन्टाइनको व्यवस्थापनमा संलग्न सुरक्षाकर्मीलाई सुरु तलबमानको ५० प्रतिशत प्रोत्साहन भत्ता पाउनेछन् । ‘किन दिने निर्णय नै सरकारले गर्नु हुन्थेन’ गृह मन्त्रालयका एक अधिकारी भन्छन्,‘निर्णय पनि गर्ने, दिन पनि नदिने कार्यशैली त लाजमर्दाे भयो ।’
सुरक्षा निकायमा कोरोना संक्रमण
नेपाल प्रहरी
कुल संक्रमित– ६९७७
निको भएको–६३२१
संक्रिय संक्रमित–६५३
मृत्युः ३
नेपाल सेना
कुल संक्रमित–४८२०
निको भएका–४५०३
सक्रिय संक्रमितः ३१५
मृत्युः २
सशस्त्र प्रहरी बल
कुल संक्रमितः १९६९
निको भएकोः१८८५
सक्रिय संक्रमितः ८०
मृत्युः ४
