प्रहरी प्रधान कार्यालयले प्रहरी भर्नाको लागि विज्ञापन खोले लग्तै प्रदेश नम्बर २ सरकारले समेत प्रहरी भर्नाको सैद्धान्तिक सहमति दिएको छ । संघिय प्रहरी ऐन संग बाझिने गरी प्रदेश २को सरकारले प्रहरी भर्ना लिने तयारी थालेको छ । प्रदेश प्रहरी ऐन पारित भएको झण्डै डेढ वर्षपछि प्रदेश २ सरकारले प्रहरी भर्ना लिने तयारी शुरु गरेको हो ।
प्रदेश २का आन्तरिक मामिला तथा कानून मन्त्री ज्ञानेन्द्र कुमार यादवले प्रदेश सरकारले प्रहरी भर्ना लिने प्रकृया चाँडै नै शुरु गर्ने बताउनुभयो । प्रदेश २को आइतबार बसेको मन्त्री परिषद बैठकमा आफूले प्रहरी भर्ना सम्बन्धि ठाडो प्रस्ताव लगेको र छठ पछि प्रहरी भर्ना लिने प्रकृया शुरु हुने मन्त्री यादवले जानकारी दिनुभयो ।
उहाका अनुसार प्रदेश सरकारले प्रहरी जवान, असई र इन्सपेक्टर पदका लागि आवेदन आह्वान गर्ने छ । उहाले ‘मन्त्रालयको सैद्धान्तिक सहमतिपछि मन्त्री परिषद बैठकमा प्रहरी भर्नाका लागि ठाडो प्रस्ताव लगेको थिएँ, छठपछि प्रकृया शुरु हुने बताउनुभयो ।
आइतबार बसेको प्रदेश २को मन्त्री परिषद बैठकमा प्रदेशसभाको चौथो अधिवेशन अन्त्य गर्ने सहमति भएको मन्त्री यादवले जानकारी दिनुभयो । यसका अतिरिक्त प्रदेश सरकारको कर्मचारीहरुको सरुवा तथा काज सम्बन्धि कार्यविधि २०७७ स्वीकृत गर्ने, प्रदेशको राजपत्र निर्देशिका २०७७को मस्यौदा स्वीकृत गर्ने निर्णय गरिएको हो । त्यस्तै प्रदेश विपत व्यवस्थापन सम्बन्धि प्रदेशको मस्यौदा निर्माणका लागि सैद्धान्तिक सहमति र दलित विकास समितिको उपाध्यक्ष पदको नियुक्ति गर्ने निर्णय गरिएको मन्त्री यादवले जानकारी दिनुभयो ।
प्रतिक्रिया दिनुहोस्