हेटौँडा । बागमती प्रदेशका नवनियुक्त मुख्यमन्त्री किरण थापामगरले पद तथा गोपनीयताको शपथ लिएका छन्।बिहीबार प्रदेश प्रमुखको कार्यालय, हेटौँडामा आयोजित विशेष समारोहमा प्रदेश प्रमुख दीपकप्रसाद देवकोटाले मुख्यमन्त्री थापामगरलाई पद तथा गोपनीयताको शपथ गराएका हुन्।थापामगरलाई प्रदेश प्रमुख देवकोटाले बिहीबार नै मुख्यमन्त्री नियुक्त गरेका थिए।
प्रदेशसभामा कुनै पनि दलको स्पष्ट बहुमत नरहेको अवस्थामा संविधानको धारा १६८ को उपधारा (२) बमोजिम थापामगर मुख्यमन्त्रीमा नियुक्त भएका हुन्।
नेकपा एमालेका प्रदेशसभा सदस्य थापामगरले राष्ट्रिय प्रजातन्त्र पार्टी (राप्रपा) र नेपाली कम्युनिस्ट पार्टीको समर्थनमा मुख्यमन्त्री पदका लागि दाबी पेस गरेका थिए। आवश्यक समर्थन जुटाएपछि प्रदेश प्रमुखले उनलाई नयाँ सरकार गठनका लागि नियुक्त गरेका हुन्।थापामगरको नियुक्तिसँगै बागमती प्रदेशमा लामो समयदेखि कायम रहेको सत्ता समीकरणको अन्योल अन्त्य भएको छ। नयाँ सरकार गठनसँगै प्रदेशको राजनीतिक समीकरणसमेत स्पष्ट भएको छ।मुख्यमन्त्री थापामगरले आजै मन्त्रिपरिषद् विस्तार गर्ने तयारी गरेका छन्। सत्ता साझेदार दलबाट मन्त्री नियुक्त गरी उनीहरूलाई समेत पद तथा गोपनीयताको शपथ गराउने तयारी भइरहेको जनाइएको छ।
