काठमाडौं। जनता समाजवादी पार्टी (जसपा)ले मंसीरभित्र समायोजन प्रक्रिया टुंग्याउने गरी कार्यदल तथा कार्यतालिका तयार पारेको छ। मंगलबार काठमाडौंमा सम्पन्न जसपाको केन्द्रीय कार्यकारिणी समितिको बैठकले समायोजन प्रक्रिया टुंग्याउन कार्यदल गठन गरेको हो। बैठकले मंसीसभित्र सबै तह र संगठनहरुको एकता टुंग्याउने निर्णय गरेको छ।
समायोजन सहजीकरणका लागि बनेको कार्यदलमा प्रदेश १ मा परशुराम खापुङ, परशुराम बस्नेत, केशव झा र मनिष सुमन तथा प्रदेश २ मा रामसहायप्रसाद यादव, मृगेन्द्रसिंह यादव, विजय यादव र सुनील रोहित छन्। यस्तै, बागमती प्रदेशमा गंगानारायण श्रेष्ठ, वृषेशचन्द्र लाल, अकवाल अहमद शाह र रणध्वज कन्दङ्वा छन्।
गण्डकीमा हेमराज राई र रमेश यादव, लुम्विनीमा नवराज सुवेदी, ईस्तियाक राई, सर्वेन्द्रनाथ शुक्ल र अमृता अग्रहरी रहेका छन्। कर्णाली प्रदेशमा भक्तबहादुर शाह र गोविन्द चौधरी तथा सुदुरपश्चिम प्रदेशमा दुर्गा सोब, नवराज सुवेदी, राजकुमार लेखी, चन्दा चौधरी र दानबहादुर विश्वकर्मालाई कार्यदलमा राखिएको छ। यसैगरी, भातृ तथा जनवर्गीय संगठन समायोजन सहजीकरण कार्यदलमा रकम चेम्जोङ, रामसहायप्रसाद यादव, हिसिला यमी, सुशीला श्रेष्ठ, उमाकान्त झा, वृषेशचन्द्र लाल, केशव झा, मनिस सुमन र दुर्गा सोब छन्।
गैर-भौगोलिक, शिल्पी र दलित विशेष प्रदेश सहजीकरण कार्यदलमा प्रकाश अधिकारी, दानबहादुर विश्वकर्मा, लक्ष्मणलाल कर्ण र महेन्द्रराय यादव, प्रवेश क्षेत्र विशेष कार्यदलमा हिसिला यमी, रेणुकुमारी यादव र राजकिशोर यादव तथा पहिचानमा आधारित राष्ट्रिय समितिहरू समायोजन कार्यदलमा राजेन्द्र श्रेष्ठ, डमरु बल्लभ खतिवडा, रणध्वज कन्दङ्वा, अरवल अहमद शाह, केशव झा र सुनील रोहित छन्।
कार्यकारिणी समितिको बैठकले प्रदेश स्तरका कमिटी कात्तिक २५ गतेभित्र समायोजन गरी सक्ने लक्ष्य लिएको छ। मंसीर १५ गतेभित्र सबै स्तानीय तहको समायोजन गरिसक्ने र जिल्ला समन्वय र निर्वाचन क्षेत्र मंसीर ३० गतेभित्र समायोजन सक्ने गरी कार्ययोजना तय गरिएको छ। जनवर्गीय संगठन, गैर भौगोलिक शिल्पीलगायतको समायोजन पनि मंसीरभित्रै सम्पन्न गर्ने गरी कार्यविभाजन गरिएको छ।
तत्कालीन राष्ट्रिय जनता पार्टी नेपाल र समाजवादी पार्टी नेपाल एकीकरण भई जसपा नेपाल गठन भएको झन्डै ७ महिनापछि समायोजनको प्रक्रिया सुरू भएको हो। केन्द्रीय कार्यकारिणी समितिबाहेक जसपाको कुनै पनि तहको संरचनामा समायोजन भएको छैन। काठमाडौंमा दुई दिन चलेको जसपा कार्यकारिणी बैठकले डा. बाबुराम भट्टराईलाई संघीय परिषद्को अध्यक्षमा निर्विरोध चयन गर्दै केन्द्रीय समितिको आकार बढाएर ८०१ जनाको बनाउने निर्णय पनि गरेको छ।
