महोत्तरीको औरहीमा व्यापारीहरुबाट जथाभावी पैसा असुलेको आरोपमा प्रहरी चौकीका इन्चार्ज शिवजी यादव विरुद्ध व्यापारीहरु विरोध प्रदर्शनमा उत्रेका छन् ।
प्रहरी विरुद्ध औरही उद्योग बाणिज्य संघका अध्यक्ष श्रवण चौधरीको नेतृत्वमा स्थानीय व्यापारीहरु पसल बन्द गरेर आन्दोलनमा उत्रेका हुन् । औरही बजार स्थित रहेका प्रहरी चौकीबाट असई शिवजी यादव लगायतका प्रहरीले व्यापारीबाट जथाभावी रुपमा पैसा माग्दै धाकधम्की दिने गरेको भन्दै स्थानीय व्यापारीहरु पसल बन्द गरेर आन्दोलनमा उत्रिएका हुन् ।
चन्दा आतंक मच्चाएका प्रहरीलाई कार्वाही गरी यहाँबाट फिर्ता बोलाउन माग गर्दै व्यापारीहरु आज विहानै बर्दिवास-जलेश्वर सडक खण्ड अन्तर्गत औरही बजारमा टायर बालेर प्रदर्शन गरिरहेका छन् । चेकजाँचको नाउमा प्रहरी बिट कै अगाडी व्यापारीबाट प्रहरीले पैसा अशुली गर्ने गरेको स्थानीय व्यापारीले आरोप लगाएका छन् ।
प्रहरी बिटको छेउ बाट केहीदिन अघिमात्र चन्दन ईलेक्ट्रोनिक र मुन्ना ट्रेडर्समा चोरी हुँदा समेत प्रहरी मुकदर्शक भएर मात्र बसेको स्थानीयहरुको भनाई छ ।
पैसा असुली गर्ने असई यादवालई तुरन्त जिल्लामा फिर्ता बोलाएर अनुसन्धान गरी कार्वाही गर्नुपर्ने जनता समाजवादीका स्थानीय नेता दरेश यादवले बताए । ईलाका प्रहरी कार्यालय गौशालाका प्रहरी निरक्षक प्रकाश रेग्मीका अनुसार असई यादवलाई जिल्ला प्रहरीमा बोलाएर अनुसन्धान समेत थालिएको छ ।
