जनता समाजवादी पार्टीका राष्ट्रीय अध्यक्ष उपेन्द्र यादवले वर्तमान सरकार संघीयता र गणतन्त्र समाप्त पार्ने षडयन्त्र गरि रहेको आरोप लगाएका छन् ।
मंगलबार समाजवादी पार्टी निकट युवा संघले जनकपुरधाममा आयोजना गरिएको पार्टी प्रवेश कार्यक्रममा अध्यक्ष यादवले वर्तमान सरकारले मुलुकलाई अस्थिर बनाएर संघीयता नै समाप्त पार्ने प्रपञ्च रचिरहेको आरोप लगाएका हुन्। नेपालको संविधानले अपरवर्तनीय रुपमा राखेको संघीय लोकतान्त्रिक गणतन्त्रलाई सरकारले चुनौैती दिने चेष्टा गरेको उल्लेख गरे ।
मुलुक कोरोना महामारीको संकट झेली रहेको समयमा सरकारको मुख्य कर्तव्य जनताको ज्यानको सुरक्षा हुनु पर्ने सरकार त्यस बाट विमुख भई अन्य चलखेलमा लाग्नु मुलुकको लागी दुर्भाग्य रहेको बताए । जनताको जिउ धनको सुरक्षा गर्न नसक्ने सरकारको आवश्यकता नरहेको उल्लेख गर्दै उनले आफु हरु सरकार विरुद्ध सबै मोर्चामा लडने उल्लेख गरे ।
आन्दोलनबाट प्राप्त उपलब्धीहरूको रक्षा गर्दै विभेद रहित समृद्ध मुलुकको निर्माणका लागि वैकल्पिक शक्तिको रूपमा जसपाको गठन भएको दाबी यादवले गरेका थिए। विश्वको हरेक परिवर्तनको नेतृत्व युवाहरूले नै गरेकोले मुलुकको विकास र समृद्धिका लागि शिक्षित र सक्षम युवाहरूलाई अगाडि बढ्न समेत यादवले आग्रह गरेका थिए।
समाजवादी युवा संघका जिल्ला अध्यक्ष दिपेन्द्र कापडीको अध्यक्षतामा भएको उक्त कार्यक्रममा युवाका संघका केन्द्रिय अध्यक्ष योगेन्द्र राय यादव, जनकपुर उपमहानगरका प्रमुख लालकिशोर साह, बौद्धिक पेशाकर्मी महासंघका केन्द्रिय उपाध्यक्ष जितेन्द्र कुमार यादव सहितका वक्ताहरुले सम्बोधन गरेका थिए ।
प्रतिक्रिया दिनुहोस्