जनकपुरधाम, १४ मंसिर । धनुषाको हँसपुर नगरपालिका वडा नं. ८ झटियाही स्थित मिथिला तिलक नन्द कुमारी कार्की माध्यमिक विद्यालयमा आठ कोठे भवन तथा छात्राहरुलाई आईतवार साइकल वितरण गरिएको छ ।
मेयर रामज्ञान मण्डल, उपमेयर रेणु झा र सोही वडाका वडा अध्यक्ष जिवछ मण्डलले संयुक्त रुपमा आठ कोठे भवन तथा कम्पाउण्डवालको शिलान्यास गरिएको हो ।
सोही वडाका वडाअध्यक्ष जिवछ मण्डलको अध्यक्षतामा भएको शिलान्यास तथा साइकल वितरण कार्यक्रममा मेयर रामज्ञान मण्डलले नगरपालिकाको पहिलो उद्देश्य नै शिक्षित नगरपालिका बनाउनुपर्ने रहेकोले सोही अनुरुप शिलान्यास तथा सात कक्षा पास गरी ८ मा गएकी छात्राहरुलाई साइकल वितरण कार्यक्रम गरिएको जनाएका छन् ।
शिक्षा बिना सामाज परिवर्तन हुँदैन, सामाज परिवर्तन नभएमा विकास सम्भव नरहेकोले आफू बढी जोड शिक्षामा दिएको मेयर मण्डलले भने, ‘मानव विकासका लागि यस नगरपालिकाको विद्यालयहरुको भौतिक संरक्षण तथा विद्यार्थीहरुको राम्रो पठनपाठन गुणस्तरीय गराउने लक्ष्य छ । बजेट पनि सोही अनुरुप छुट्याइएको हो ।’
विद्यालय भवन तथा कम्पाउण्डवाल निर्माणका लागि करीब २ करोड रुपैया छ्ट्याईएको छ । त्यस्तै ७० जना छात्रालाई साइकल वितरण गर्ने गरेको उनले भने । बि.सं. २००८ सालमा विद्यालय निर्माण भएपनि अहिलेसम्म जिर्णोद्धार भएको थिएन । आफू मेयर भएपछि शिक्षामा नै सबभन्दा बढी लगानी गर्ने प्रतिबद्धता समेत जनाएका थिए । प्रतिबद्धता अनुसार नै कार्य अगाडि बढिरहेको मेयर मण्डलले बताएका छन् ।
कार्यक्रममा उपमेयर रेणु झा, जनता समाजवादी पार्टीका जिल्ला अध्यक्ष प्रमोद यादव र पशुपतिनाथ यादव, टाइम्पस टेलिभिजनका सञ्चालक विष्णु कुवर, पत्रकार कैलास दास लगायतका व्यक्तिहरुले शिक्षाको बारेमा प्रकाश पारेका थिए ।
प्रतिक्रिया दिनुहोस्