जनकपुरधाम। जनता समाजवादी पार्टी नेपाल ( जसपा ) प्रदेश न २ संसदीय दलके उपनेता तथा प्रदेश सांसद माननीय रामअशिष यादवले प्रधानमन्त्री ओली संविधानको विधि र पद्धति अनुसार नचलेका कारण देशमा समस्या भएको आरोप लगाउनुभएको छ ।
प्रतिनिधिसभा विघटनको विरुद्धमा घोषित दोस्रो चरणको आन्दोलनका कार्यक्रम अन्र्तगत जसपाले सोमबार विरुद्ध सभामा सहभागी हुन नागरिक समाजसँग जनकपुरमा गरेको विरुद्धसभामा यादवले प्रधानमन्त्रीले लोकतन्त्र र संविधानलाई समाप्त गर्न लागेको भन्दै यस विरुद्ध सबै एकजुट भएर लाग्न आग्रह गर्नुभएको हो ।
प्रधानमन्त्री ओली संविधानको विधि र पद्धतिमा नचलेको कारणले देशमा समस्या आएको उहाँको आरोप थियो । त्यस्तै संविधान र लोकतन्त्रको रक्षा गर्नुपर्ने बेला आएको भन्दै संसद पुनस्र्थापना मार्फत मात्रै संविधानलाई बचाउन सकिने बताउनुभयो ।
कार्यक्रममा जसपा धनुषा जिल्ला अध्यक्ष पशुपति यादव सरकारबाट अदालतलाई धम्की दिने काम भइरहेको भन्दै त्यस्तो कार्य तत्काल बन्द गर्नुपर्ने बताउनुभयो । संसद विघटनका लागि ओलीसँगै समग्र नेकपा नै जिम्मेवार रहेको उहाँले भनाइ थियो ।
त्यस्तै मानव अधिकारवादी कृष्ण पहाडीले प्रधानमन्त्री ओलीको असंवैधानिक कदमविरुद्ध संयुक्त आन्दोलनको आवश्यकता औल्याउनुभयो । राष्ट्रिय मानव अघिकार आयोगकी पूर्व सदस्य मोहना अन्सारीले राजनीतिक दलको झगडामा नेपाली जनता असहजतामा बाँचिरहेको बताउनुभयो ।
कार्यक्रमका वक्ताहरूले सन्सद विघटन बारे नेकपाका तर्फबाट भएका कमीकमजोरी, गल्तीप्रति जनता सामु माफी माग्नुपर्ने धारणा समेत राखेका थिए ।
