जनकपुरधाम, पुष १४ गते। जनता समाजवादी पार्टी नेपालले मधेश प्रदेश संसदीय दलको नेता चयन गर्नका लागि निर्वाचन समिति गठन गरेको छ ।
सो समितिमा लालकिशोर साह, दिनेश कुमार यादव र रबिन्द्र गिरी रहेका छन् । जसपा मधेश प्रदेश समितिका मुख्यसचिव दिनेश कुमार यादवका अनुसार संसदीय दलको नेता चयन गर्ने प्रक्रिया सुरु भएको छ, त्यसैका लागि विधानतः यो समिति गठन गरेको हो ।
उनले भने, ‘सम्भवतः सहमतिमा नै नेता चयन हुनेछ तर विधानअनुसार प्रक्रिया पुरा गर्नका लागि यो समिति गठन गरिएको हो ।’ जसपा नेपालसँग मधेश प्रदेशमा नौ जना प्रत्यक्ष र सातजना समानुपातिक गरी १६ जना सांसद रहेका छन् ।
संसदीय दलका नेताका लागि लालबाबु राउत, सरोज यादव, रामअशिष यादव, सरोज सिंह कुश्वाहा, आकाङ्क्षी रहेका छन् । उनीहरूको बीचमा सहमति जुटाउने प्रयास हुनेछ । नभए लोकतान्त्रिक प्रक्रियाबाट टुङ्गो लगाइको स्रोतले जानकारी दिएको छ।
