वीरगञ्ज । पर्सामा १९ राउण्ड गोलीसहित भारतीय नागरिक पक्राउ परेका छन् । बिहार पश्चिम चम्पारण जिल्ला वेतियाग्राम लगुनाहा–१४ का २२ वर्षीय मुरारी कुमार कुशवाह १९ राउण्ड गोलीसहित वीरगञ्जबाट पक्राउ परेका हुन् ।उनलाई वीरगञ्जको भानुचोकस्थित सडकखण्डबाट प्रहरी चौकी बसपार्कबाट खटिएको टोलीले पक्राउ गरेको हो ।
चेकिङका क्रममा उनको साथबाट १९ राउण्ड गोली फेला परेको जिल्ला प्रहरी कार्यालय पर्साले जनाएको छ ।
हातमा झोला बोकेर पैदल हिँड्दै बसपार्कतर्फ आउँदै गरेको अवस्थामा खानतलासी गर्दा १२ शक्तिमान १२ एक्सप्रेस लेखिएको सर्टगनमा लाग्ने १५ राउण्ड गोली, केएफ १२ लेखिएको सर्टगनकै ३ राउण्ड गोली र १२ केएफ १२९६ लेखिएको ९ राउण्ड गोली गरी १९ राउण्ड गोली उनको साथबाट बरामद भएको प्रहरीको भनाई छ ।पक्राउ परेका कुशवाहविरुद्ध हातहतियार तथा खरखजना मुद्दामा जिल्ला अदालत पर्साबाट म्याद लिई थप अनुसन्धान सुरु भएको बताइएको छ ।
प्रतिक्रिया दिनुहोस्