हर्क साम्पाङको प्रश्न – प्रधानमन्त्री बालेन यो संसदको सदस्य हो कि होइन ?

काठमाडौं । श्रम संस्कृति पार्टीका अध्यक्ष हर्क साम्पाङले प्रधानमन्त्री बालेन्द्र शाह ‘बालेन’ प्रतिनिधिसभाको बैठकमा उपस्थित नभएको विषयमा बिहीबार पनि प्रश्न उठाएका छन् । बिहीबारको बैठकमा सुरु हुनासाथ समय पाएका उनले प्रधानमन्त्री बालेन संसदको सदस्य हो कि होइन भनी प्रश्न गरे ।उनले भने–‘नियमावलीमा सात दिनभित्र सम्बन्धित मन्त्रीले उत्तर दिनुपर्छ भनिएको छ । उहाँ यो संसदको मेम्बर हो कि होइन ?’ साम्पाङले प्रश्न गरे ।

प्रधानमन्त्री बालेनले गृह मन्त्रालय आफैँसँग राखेकाले सुकुम्बासी समस्यालगायतका विषयमा प्रश्न रहेको उनले बताए । ती प्रश्नको जवाफ प्रधानमन्त्रीले संसदमा आएर दिनुपर्ने उनको भनाइ थियो ।उनले कर्तव्य पूरा गर्न नसक्ने हो भने मार्गप्रशस्त गर्दा राम्रो हुने बताए । उनले भने–‘संसदको गरिमा जोगाइ राख्न पर्छ कि पर्दैन ? कर्तव्य पूरा गर्न सक्नु हुन्छ कि हुँदैन ? कर्तव्य पूरा गर्न सक्नु हुन्नभने मार्गप्रशस्त गर्दा राम्रो ।’यसैबीच, साम्पाङले आज पनि संसदमा विरोध जनाए । बैठक सुरु हुने वित्तिकै उठेर उनले प्लेकार्ड देखाएर विरोध जनाएका हुन् । जेठ ४ गतेदेखिका प्रतिनिधिसभाको बैठकमा निरन्तर प्लेकार्ड देखाउँदै आएका साम्पाङलाई बुधबार सभामुख डोलप्रसाद अर्यालले आफ्नो व्यवहार सच्याउन चेतावनी दिएका थिए ।तर आज पनि उनी संसदमा उठेर प्ले कार्डसहित प्रस्तुत भएका हुन्। यद्यपी सभामुख अर्यालले आज भने उनलाई बोल्न समय दिए ।साम्पाङ मंगलबारको प्रतिनिधिसभा बैठकमा पनि सभामुख अर्याल समय नदिएपछि बैठकबाटै बाहिरिएका थिए ।