काठमाडौं । अख्तियार दुरुपयोग अनुसन्धान आयोगले प्रहरीलाई सदारचारसम्बन्धि तालिम दिनुपर्ने औल्याएको छ । बिहीबार राष्ट्रपति बिद्यादेवी भण्डारीलाई आफ्नो ३० औं प्रतिवेदन बुझाउँदै आयोगले प्रहरी कर्मचारीलाई दिइने आधारभुत तालिममा सदाचारसम्बन्धि विषयवस्तु समेत समाबेश गरी सत्यनिष्ठाप्रति अभिमुखीकरण गर्नुपर्ने सुझाव सरकारलाई दिएको हो ।
आयोगले प्रहरी लगायत सरकारी कर्मचारीको तलब तथा सेवा सुविधा बढाउनुपर्नेमा पनि जोड दिएको छ । आयोगले वार्षिक मूल्यवृद्धिको अनुपातमा तलब बढाउन सुझाब दिएको हो । प्रतिवेदनमा राखिएको सुझाबमा भनिएको छ, ‘मुलुकको आर्थिक विकासको स्तर एवं आर्थिक अवस्थाअनुरूप सबै तहका कर्मचारीलाई आधारभूत आवश्यकता परिपूर्ति गर्न सक्ने गरी यथोचित तलबलगायतको आवास, शिक्षा, स्वास्थ्यजस्ता सुविधाको व्यवस्था गर्ने र वार्षिक मूल्यवृद्धिको अनुपातमा स्वतः तलब वृद्धि हुने व्यवस्था गर्ने ।’ तलब बढाउँदा भ्रष्टाचार न्यूनीकरण हुने आयोगका अधिकारीहरु बताउँछन् ।
आयोगले प्रतिवेदनमा निजी र गैरसरकारी क्षेत्रको भ्रष्टाचारको छानबिन गर्ने कानुनी व्यवस्था गर्न पनि सुझाब दिएको छ । आयोगले यससम्बन्धि छानिबन आफैंबाट हुनुपर्ने भन्दै लबिङ गर्दै आएको छ । साथै मन्त्रिपरिषबाट हुने नीतिगत निर्णय र प्रशासनिक निर्णयलाई प्रस्ट पार्नुपर्नेमा आयोगले सरकारलाई आग्रह गरेको छ ।
