विराटनगर । जटिल रोगका साथ जन्मिएका ४८ घण्टा मै एक नवजात शिशुको म्याक्समा सफल शल्यक्रिया गरिएको छ ।
मलद्वारविहीन अवस्थामा जन्मिएका ती बालकको विराटनगरस्थित म्याक्स अस्पतालका चिकित्सकहरुले सफल शल्यक्रिया गरेका छन । उदयपुरको कटारीका ती बालकलाई जन्मिदै ‘एनोरेक्टल मालफर्मेशन’ समस्या थियो ।
उदयपुरमै सामान्य अवस्थामा जन्मिएका बालकमा पछि गम्भिर समस्या रहेको पत्ता लागेको थियो ।
शरिरका सबै अंग सामान्य रहेपनि मलद्वार नभएका कारण जन्मिएको केहि घण्टा पछि नै शिशुको पेट फुल्दै गएको परिवारजनले बताएका छन ।
शिशुमा गम्भिर समस्या देखिएपछि परिवारजनले उपचारकालागि भन्दै मधेश प्रदेशको राजधानी जनकपुरधाम लिएर गएका थिए । त्यहाँका चिकित्सकहरुले जनकपुरधाममा उपचार सम्भव नहुने बताउँदै विराटनगर लैजान सुझाव दिएको परिवारजनले बताएका छन ।
म्याक्स अस्पतालमा समेत यसरोगको शल्यक्रिया हुने जानकारी पाएपछि नवजात शिशु लिएर विराटनगर आईपुगेको नवजात शिशुका हजुरआमा जालो दनुवारले बताउनुभयो ।
चिकित्सकहरुले ती नवजात शिशुको शल्यक्रिया गरेर तत्कालकालागि पेटको देब्रे कुनाबाट अस्थाई मल निष्काशन प्रणाली बनाईदिएका छन । शिशुको ६ महिनापछि दोश्रो पटक र ९ औ महिनामा तेश्रो पटकगरि थप दुईवटा शल्यक्रिया गरेर प्राकृतिक अवस्थाकै मलद्वार प्रणाली विकास गरिने चिकित्सकहरुले बताएका छन ।
असार ९ गते गम्भिर अवस्थामा अस्पताल ल्याइएका शिशुको सोहि राति अस्पतालका बरिष्ठ बालरोग बिशेषज्ञ डाक्टर फरेन्द्र शाहको नेतृत्वमा अस्पतालका पेडियाट्रिक सर्जरी टिमका बरिष्ठ सर्जन डाक्टर रामाशंकर यादवको टिमले शल्यक्रिया गरेको थियो ।
शल्यक्रियापछि शिशुको स्वास्थ्य अवस्थामा राम्रो सुधार भईरहेको र आउदो एक दुईदिनमैं डिस्चार्ज गरिने अस्पतालको अध्यक्ष जितेन्द्र यादवले जनाएको छ । अध्यक्ष यादवको अनुसार ‘एनोरेक्टल मालफर्मेशन’ नामक यो रोग हजारौं नवजात शिशु मध्ये कुनै एकमा देखापर्ने समस्या रहेको चिकित्सकहरुले बताएका छन ।
यो रोगको शल्यक्रियामा मृृत्यूदर समेत अत्यधिक रहेको चिकित्सक साहले बताउनुभएको छ । प्रदेश एकमा यसप्रकारको जटिल रोगको शल्यक्रिया सेवा म्याक्स अस्पतालमा मात्र उपलब्ध रहेको अस्पतालले दाबी गरेको छ ।
