जनकपुरधाम, २८ असोज । धनुषाको हँसपुर नगरपालिका वडा नं. २ कक्षा ८ मा अध्ययनरत छात्रालाई एक समारोहबीच साईकल वितरण गरिएको छ । वडा नं. २ बघचौडा स्थित श्री उच्च माध्यमिक विद्यालयका ७४ जना छात्रालाई साइकल वितरण गरिएको छ ।
सोही वडाका वडाअध्यक्ष उदय कुमार साहको अध्यक्षतामा भएको साइकल वितरण कार्यक्रमका प्रमुख अतिथि हँसपुर नगरपालिकाका मेयर रामज्ञान मण्डलले यस नगरपालिकालाई समृद्ध र शिक्षित नगरपालिकाको रुपमा विकास गर्ने ठोकुवा गरेका छन् ।
मेयर मण्डलले भने, ‘निर्माण कार्यभन्दा बढी प्राथमिकता आफू विद्यालयको पूर्वाधार, शिक्षा सामाग्री, शौचालय लगायतमा दिएका छौं । शिक्षाको विकासले समाजको विकास हुन्छ र सामाजको विकासबाट गाउँको विकास निश्चित छ ।’
मेयर मण्डलले तत्काल यस नगरपालिका भित्र रहेको सबै समुदायिक विद्यालयको एउटै रंगको बनाउनका लागि ५० लाख रकम समेत छुट्याइएको बताएका छन् ।
‘बाल विवाह हुन दिन्न’ मेयर मण्डलले भने, ‘बाल विवाह हाम्रो समाजको ठूलो रोग हो । यसलाई रोक्न स्थानीय तहमा सामाजिक कानून नै निर्माण गर्छौ ।’ बेटी बचाउन, बेटी पढाउन हाम्रो मुख्य नारा रहेको उनले जिकिर पनि गरे ।
साइकल वितरण कार्यक्रममा उपमेयर रेणु झा, राष्ट्रिय दलित पत्रकार संघका प्रदेश अध्यक्ष कैलास दास, शिक्षक, अभिभावक तथा राजनीतिक दलका प्रतिनिधिहरु समेत आफ्ना विचार राखेका थिए ।
प्रतिक्रिया दिनुहोस्