सर्लाही । टाउको काटिएको अवस्थामा चैत ११ गते मृत फेला परेका सुशील यादवको हत्या चोरी गरेको आरोपमा भएको खुलेको छ ।
यादवले सामान चोरेको आरोप लगाएर छिमेकीले हत्या गरेको प्रारम्भिक अनुसन्धानबाट देखिएको सर्लाहीका प्रहरी प्रवक्ता मदन कुँवरले बताए ।
मलगंवा नगरपालिका– १० का २५ वर्षका यादवको शव टाउको काटिएको अवस्थामा चैत ११ गते फेला परेको थियो । हत्या आरोपमा प्रहरीले त्यसै दिन यादवका छिमेकी ४५ बर्षका विमलकान्त पाठक र उनका भाजा भारत विहारका ४१ बर्षीय अशोक
झालाई पक्राउ गरेको थियो ।प्रारम्भिक अनुसन्धानका क्रममा उनीहरु नै हत्यामा संलग्न भएको देखिएपछि थप अनुसन्धानका लागि जिल्ला अदालतबाट ७ दिन थुनामा राख्न अनुमति लिएको प्रहरीले बताएको छ ।
प्रहरीका अनुसार सुशीलको हत्या हुनु केही दिनअघि विमलकान्तको पानी तान्ने मोटर र जुत्ता चोरी भएको थियो । विमलकान्तले यी सामान सुशीलले नै चोरेको आरोप लगाउँदै आएका थिए ।
यो विषयमा उनीहरुबीच पटक पटक विवाद भएको थियो । यही कारण विमलकान्तले सुशीललाई मार्ने योजना बनाएको देखिएको सर्लाहीका प्रहरी प्रवक्ता कुँवरले बताए ।
योजनाअनुसार अशोकले सुशीललाई मामाले बोलाएको भनी विमलको घर लगेका थिए । प्रहरीका अनुसार उनीहरुले विमलको घरमा लागू औषध सेवन गरेका थिए ।खाना खाएर परिवारका सदस्य सुतेपछि तीनै जनाले लागू औषध सेवन गरेको र त्यस क्रममा सुशीललाई अत्यधिक प्रयोग गर्न लगाएर लठ्ठ पारेको पाइएको प्रहरीको भनाइ छ ।
लठ्ठ अवस्थामा सुशीललाई नजिकैको गाईगोठमा लगी डोरीले बाँधेर धारिलो हतियार प्रहारबाट हत्या गरेको पाइएको प्रहरीले बताएको छ । घटनाको विषयमा अनुसन्धान भइरहेको प्रहरीको भनाइ छ ।
हत्या आरोप लागेका विमलकान्त लागू औषध मुदमा यसअघि पक्राउ परेको र धरौटीमा छुटेको व्यक्ति भएको प्रहरी प्रवक्ता कुँवरले बताए ।
