जनकपुरधाम, भदौ १६ : हिजो र आज धनुषाको गणेशमान चारनाथ नगरपालिकाको बरमझिया स्थित कमला र चारनाथ नदीको संगम स्थल (घाट) र सवैला नगरपालिकाको सतोषर स्थित श्री सप्तेश्वरनाथ महादेवमा लाखौंको भिडभाड हुन्थ्यो । तर वर्ष त्यस्तो देखिएन कोरोना कहरका कारण बोलबम र मेला प्रभावित भएको छ भने मन्दिरमा समान्य चहलपलह देखिएको छ ।
दशकौं दशक देखि धनुषाको सप्तपोखर (सतोषर) मा लाग्दै आएको बिशाल बोलबम मेला यसपाली प्रभावित भएको छ । कोरोना भाइरसको महामारी समुदाय स्तरसम्म पुगेको भन्दै धनुषाको गणेशमान चारनाथ नगरपालिकाको बरमझिया स्थित कमला र चारनाथ नदीको संगम स्थल (घाट) मा भरिने जल र मेला कार्यक्रम समेत स्थानिय प्रशासनले गर्न रोक लगाएकाले प्रभावित भएको देखियो । बोलबमका श्रद्धालुहरु जल भरेर धनुषाको सबैला नगरपालिकाको सतोषर स्थित रहेको सप्तेश्वरनाथ महादेव मन्दिरमा चढाउने गरिन्छ ।
अनन्त चतुर्थीको दिन लाग्ने सो मेला स्थगित गर्न दुवै नगरपालिकालाई प्रशासनले आग्रह गरेको थियो । पूर्वी धनुषा सहित अन्य विभिन्न स्थान र भारतको विहारवाट समेत प्रत्येक वर्ष हजारौं हजारको सँख्यामा काँवरियाहरु सतोषर महादेवमा जल चढाउने गरिन्छ । जल चढाउने श्रद्धालुहरु एक दिन अगावै बरमझिया पुगेर विश्राम गर्दै विहानै जल भरी सतोषर महादेवमा चढाउने गर्दै आएको छ ।
सवैला नगरपालिकाका मेयर विजय शंकर साहले बोलबम र मेला प्रभावित भएको यद्यपि सतोषरनाथ मन्दिरमा सुरक्षा सर्तकता सहित स्थानियले जल अर्पण गर्नुका साथै पुजापाठ गरेको बताए । उनले आफु स्वयम मेलाको निरिक्षण गरेको भन्दै आस्था र त्यसमा पनि विशेष दिन भएकालाई सवैलाई रोक्न नसकिने बताए । यसपाली निकै कमी भएपनि बोलबम मेलालाई भने निरन्तरता दिइएको छ । स्थानीय प्रशासनले भीडभाड गर्न नदिन कुनै प्रकारको मेला नलगाउन आग्रह गरेपनि मेयर साहले लागेको मेलालाई स्वयंम नीरिक्षण नै गर्न पुगेका थिए । मेयर साहले मन्दिरको सौन्दर्यकरणका लागि नगरपालिकाले रंगरोगनको काम समेत गराएको बताए । सतोषर पुग्ने क्रममा बोलबमका तिर्थालुहरुको भिड बाटोमा पर्ने रघुनाथपुर स्थित श्री हरिहरनाथ मन्दिरमा पनि लाग्ने गर्दछ ।
