शहीदको बलिदानीलाई खेर जान नदिने उद्घोष
जनकपुरधाम, मंसिर १० । मुख्यमन्त्री लालबाबु राउतले शहीदहरुको बलिदानीलाई प्रदेश सरकारले खेर जान नदिने बताउनु भएको छ ।
शहीद नगर नपाको हरबाडामा नवनिर्मित शहीद कामेश्वर कुशेश्वर सभागृहको उद्घाटन गर्नु हुँदै मुख्यमन्त्री राउतले शहीद कामेश्वर कुशेश्वर जस्ता शहीदहरुले दिनु भएको बलिदानीकै फल स्वरुप मुलुकमा संघीय लोकतान्त्रिक गणतन्त्र स्थापना भएको उल्लेख गर्नु भयो ।
शहीदहरुको बलिदानीको बलमा स्थापित प्रदेश सरकार शहीदहरुले देखेको सपना साकार गर्न सदैब तत्पर रहने विश्वास दिलाउनु भयो ।
मुख्यमन्त्री राउतले प्रदेश सरकार समाजमा पछाडी परेका समुदायहरुको उन्नयनको लागी जनसंख्याको अनुपातमा आरक्षणको व्यवस्था, छोरीहरुको शिक्षामा पहुँच बढाउन बेटी पढाउ बेटी बचाउ जस्ता कार्यक्रमहरु ल्याएको बताउनु भयो ।
छोरी शिक्षा विमा कोभिड महामारीका कारण हाललाई स्थगित भए पनि छिट्टै संचालन हुने र त्यसले समाजमा नयाँ क्रान्ति ल्याउने उहाँको दावी थियो ।
कार्यक्रममा बिशिस्ट अतिथी प्रदेश सभा सदस्य राम आशिष यादवले ७५ बर्ष पुरानो नेपाली कांग्रेस र ७२ बर्ष पुरानो कम्युनिष्टको विकल्प जनता समाजवादी पार्टी मात्र रहेको उल्लेख गर्नु हुँदै ४९ बर्ष पहिले सहिद भएका कुशेश्वर कामेश्वरको योगदानलाई काँग्रेस र एमालेले बिर्से पनि जसपा दैनिक स्मरण गर्ने गरेको बताए । पुरानो पार्टीहरु परिवारवादको पृष्ठपोषक भएको उल्लेख गर्दे यादवले ज स पा जनताको आबश्यकता रहेको भन्दै विभिन्न पार्टी बाट जसपामा प्रवेश गरेका नव प्रवेशीहरुलाई स्वागत गरेका थिए ।
स्थानीय विनोद मण्डलको अध्यक्षतामा भएको उक्त उद्घाटन समारोहमा जसपाका नगर अध्यक्ष दिनेश यादव, उपाध्यक्ष सिता मण्डल, उपेन्द्र ठाकुर ताराचन्द्र यादव, उमेश निराला सहितका वक्ताहरुले सम्बोधन गर्नु भएको थियो ।
उक्त कार्यक्रममा विभिन्न पार्टी परित्याग गरेका करिब एक सय जना जसपामा प्रवेश गरेका थिए ।
