दार्चुला : महाकाली नदि किनारबाट अवैध रुपमा बालुवा उत्खनन गर्ने कार्य अझै रोकिएको छैन ।
बालुवा उत्खनन गरी बनेको पानीको खाडलमा एक बालक डुबेका छन् । जिल्लाको व्याँस गाउँपालिका — ६ स्याँकु घर भएर हाल खलंगा सदरमुकाम बस्ने कलावती धामीका ८ वर्षीय छोरा यादव धामी पानीको खाडलमा डुबेका हुन् । शनिवार अपरान्ह ४ बजेतिर पानीमा डुबेका धामीको अवस्था गम्भिर रहेको जिल्ला अस्पताल दार्चुलाले जनाएको छ । अपरान्ह पानीमा पौडी खेल्ने क्रममा डुबेर घाइते भएको जिल्ला प्रहरी कार्यालय दार्चुलाका सुचना अधिकारी एवं प्रहरी निरीक्षक सुरेन्द्र प्रसाद जोशीले जानकारी दिए ।
नदि किनारमा पानी जम्मा भएको खाडलमा पौडी खेलीरहेका दाजुभाइ मध्ये ८ वर्षीय भाई डुबेको उहाले बताए । गम्भिर घाइते धामीको जिल्ला अस्पतालमा उपचार सम्भव नभएपछि धनगढी रेफर गरिएको अस्पतालका डा. दिपेश मंगल जोशीले बताए ।
महाकाली नदीको तटबन्ध र पुलकै छेउबाट ढुङ्गा–बालुवा उत्खनन् कार्य भईरहेको छ । महाकाली नदी क्षेत्रबाट मापदण्ड विपरित नदीजन्य पदार्थ उत्खनन् भईरहेको हो । महाकाली नदीको किनारामा निर्माण गरिएको तटबन्ध छेउबाटै ढुङ्ग, वालुवा, गिटी उत्खनन् भईरहेको छ ।
बजार क्षेत्रको लास्कुखोला, बंगावगड क्षेत्र, विरेन्द्र वन क्षेत्र लगायत खेट्टेबगडमा समेत बालुवा उत्खनन भइरहेको छ । वालुवा उत्खनन्ले नदि किनारमा खाडलै खाडल बनेका छन् । महाकालीबाट अबैध उत्खनन् भईरहेको विषयमा पटक पटक स्थानिय प्रशासन तथा जिल्ला समन्वय समितिलाई पत्राचार गर्दा समेत रोकिएको छैन् । अवैध उत्खनन् कार्यले महाकाली नदी किनारामा बनेको पक्की तटबन्ध धरापमा परेको छ । सम्बन्धित निकायले सयममै यस विषयमा ध्यान दिन जरुरी रहेको छ ।
